काठमाडौं,चैत्र,२०-चितवनस्थित गौतमबुद्ध अन्तर्राष्ट्रिय क्रिकेट रंगशाला स्वामित्व ग्रहण गरेर निर्माण अघि बढाउने निर्णय सरकारले गरेको छ।
सोमबार बसेको मन्त्रिपरिषद्को बैठकले धुर्मुस-सुन्तली फाउन्डेसले निर्माणका क्रममा खर्च अभावमा अधुरो छोडेको रंगशाला बनाउने निर्णय लिएको हो।
एकजना मन्त्रीका अनुसार अब रंगशालाको सबै स्वामित्व ग्रहण गरेर सरकारले आवश्यक बजेट व्यवस्थापछि निर्माण अघि बढाउने भएको हो।
नेपाली क्रिकेट टोलीले विश्वकप क्रिकेट लिग डिभिजन २ खेल्दै विश्वकप छनोटमा पुगेका बेला एउटा राम्रो रंगशाला नभएको भन्दै चर्को आलोचना भएको थियो।
धुर्मुस-सुन्तली फाउन्डेशनले १७ करोड बढी खर्च भएको भन्दै त्यसको स्वामित्व लिएर निर्माण अघि बढाउन सरकारलाई आग्रह गरिरहेको थियो।यस्तोमा सोमबारको मन्त्रिपरिषद्ले रंगशालाको सबै स्वामित्व लिँदै निर्माणका लागि प्रक्रिया अघि बढाउने निर्णय लिएको हो।
यसअघि सरकारको आर्थिक वर्ष २०७९/८० को नीति तथा कार्यक्रममा समेत यो रंगशाला आफैं बनाउने उल्लेख थियो।तर बजेट व्यवस्थापन हुन सकेको थिएन।मन्त्रिपरिषद् बैठकले भरतपुर महानगरलाई १२ करोड रुपैयाँ दिएर रंगशाला निर्माणका क्रममा हालसम्मको हिसाब फरफारक गर्ने निर्णय गरेको छ।
रंगशाला निर्माण गरिरहेको धुर्मुस सुन्तली फाउण्डेसनले निर्माण सामग्री लगायतको १७ करोड बढी रकम भुक्तानी गर्न बाँकी छ।यो रकम कसले तिर्ने भन्ने विवादका कारण रंगशाला निर्माणको जिम्मा कसले लिने भन्ने अलमल लामो समय रह्यो ।
मन्त्रिपरिषदको निर्णयपछि अब भरतपुर महानगरले हिसाब फरफारक गर्नेछ।रंगशाला निर्माणको काम भने युवा तथा खेलकुद मन्त्रालयमार्फत अघि बढाउने निर्णय भएको एक मन्त्रीले जानकारी दिनुभयो।उहाँका अनुसार, ‘निर्माण सम्पन्न भएपछि महानगरलाई हस्तान्तरण हुने बताउनुभयो।
सरकारको यो निर्णयपछि भरतपुर महानगरपालिकाकी मेयर रेनु दाहालले पनि अथक प्रयासले सार्थकता पाउन लागेको बताउनु भएको छ।
‘अथक प्रयासपश्चात हामी सबैको सपना गौतमबुद्ध अन्तराष्ट्रिय क्रिकेट रंगशाला निर्माण गर्ने कार्य पूरा हुँदै’, उहाँले सोमबार साँझ, ‘चितवनबासी लगायत सम्पूर्ण खेलाडीहरूमा बधाई।प्रधानमन्त्री पुष्पकमल दाहाल प्रचण्ड र नेपाल सरकारलाई हार्दिक धन्यवाद ज्ञापन समेत व्यक्त गर्नु भएको छ।
