काठमाडौं,जेठ,१७-नेपालमा शनिबार एकैदिन १८९ जनामा कोरोना संक्रमण पुष्टि भएको छ ।स्वास्थ्य तथा जनसंख्या मन्त्रालयद्वारा शनिबार आयोजित नियमित पत्रकार सम्मेलनमा मन्त्रालयका प्रवक्ता डा. विकास देवकोटाले पछिल्लो २४ घन्टामा थप १८९ जनामा कोरोना संक्रमण पुष्टि भएको जानकारी दिनुभयो।
उहाॅंले योसँगै नेपालमा संक्रमितको संख्या एक हजार ४०१ पुगेको बताउनुभयो ।उहाॅंका अनुसार कपिलवस्तुमा १०९, सर्लाहीमा १७, दैलेखमा १४, सिरहामा ११, सप्तरीमा नौ, धनुषामा सात, रौतहटमा छ, दाङमा पाँच, महोत्तरीमा चार, पर्सामा दुई, संखुवासभामा दुई, झापा, ललितपुर र बारामा एक/एकजनामा संक्रमण देखिएको हो ।
कुल संक्रमितमध्ये हालसम्म २१९ जना निको भएर घर फर्किइसकेका छन् । हाल देशभर ‘क्वारेन्टाइन’मा एक लाख १० हजार ८८ जना रहेका छन् । ‘आइसोलेसन’मा एक हजार १७६ जना रहेका उनले जानकारी दिनुभयो ।
मन्त्रालयकाअनुसार शनिबारसम्म नेपालमा ‘आरडीटी’ विधिबाट एक लाख सात हजार ५५ नमुना परीक्षण भएका छन् । ‘पीसीआर’ विधिबाट भने हालसम्म ६६ हजार ७२९ परीक्षणहरु गरिएका छन् ।
नेपालमा हालसम्म कोरोना संक्रमणबाट सिन्धुपाल्चोकका एक, बाँकेका एक, गुल्मीका एक, बाराका एक, ललितपुरका एक र अर्घाखाँचीका एक गरी छजनाको मृत्यु भएको छ ।
