काठमाडौं, मंसिर २८-
नेपाल एसीसी अन्डर यु–१६ क्रिकेट च्याम्पियनसिपको सेमिफाइनलमा प्रवेश गरेको छ । समूह चरणको अन्तिम खेलमा म्यानमारलाई ३३७ रनको विशाल अन्तरले हराउँदै समूह विजेताकोरुपमा नेपालले प्रतियोगिताको अन्तिम चारमा स्थान सुरक्षित गरेको हो ।
थाइल्यान्डमा जारी प्रतियोगिताअन्तर्गत् आज दिउँसो सम्पन्न खेलमा टस जितेर पहिले ब्याटिङ गरेको नेपालले ३५१ रनको लक्ष्य दिएको थियो । विस्फोटक ब्याटिङ गरेको नेपालले निर्धारित् ३५ ओभरमा ६ विकेट गुमाएर ३५० रन जोड्यो । नेपालका लागि कप्तान रित गौतमले अविजित १०६ रन जोडे ।
यसैगरी, तीर्थराज दासले ६४ रन जोड्दा प्रतिस जिसीले अविजित ६३ रनको योगदान दिए । जवाफमा ३५१ रनको लक्ष्य लिएर मैदान उत्रिएको म्यानमार मात्र १३ रनमा अलआउट भयो । नेपालका लागि नारायण जोशी र मेखबहादुर थापाले समान ४/४ विकेट लिए । ८ टोली सहभागी प्रतियोगिताको समूह ‘ए’बाट नेपालसँगै उपविजेता बन्दै हङकङले पनि सेमिफाइनलमा स्थान बनाएको छ ।
