काठमाडौं,कार्तिक,८
पोखरा प्रिमियर लिग (पिपिएल) ट्वेन्टी–ट्वेन्टी क्रिकेट प्रतियोगिताको सुरुवाती संस्करण भोलिदेखि पोखरामा हुँदैछ ।फ्रेन्चाईज शैलीमा हुने प्रतियोगिताको पहिलो संस्करणमा पोखरा पल्टन, विराटनगर टाइटन्स, काठमाडौं रोयल्स, चितवन राइनोज, बुटवल ब्लास्टर र एक्सपर्ट धनगढी ब्लुज गरी ६ टोलीले प्रतिस्पर्धा गर्नेछन् ।
प्रतियोगिताको उद्घाटन खेलमा भोलि स्थानीय पोखरा पल्टनले विराटनगर टाईटन्ससँग खेल्नेछ । पोखरा रंगशालामा हुने खेलहरुका लागि झण्डै तीन महिना लगाएर अन्तर्राष्ट्रियस्तरको पिच तयार पारिएको आयोजकको दावी छ ।
प्रतियोगिताको लागि तयार पारिएको भौतिक पूर्वाधारले पोखरामा मात्रै नभएर सिंगो देशकै क्रिकेट विकासमा टेवा पुग्ने नेपाली राष्ट्रिय क्रिकेट टोलीका मुख्य प्रशिक्षक जगत टमाटा बताउँछन् ।
पिपिएलमा सहभागि टोलीहरुले विदेशका दुई जना खेलाडीलाई टोलीमा समावेश गर्न पाउने नियम छ । जसअनुसार हरेक टोलीका विदेशी खेलाडीहरु पोखरा पुगिसकेका छन् ।
प्रतियोगिताको आयोजक क्विन्स ईभेन्टका प्रबन्ध निर्देशक छुम्बी लामाका अनुसार विजेता टोलीले नेपाली क्रिकेटमा अहिलेसम्मकै धेरै २७ लाख रुपैयाँ पुरस्कार जित्नेछ ।
प्रतियोगिता यही कार्तिक २० गतेसम्म चल्नेछ । धनगढीमा धनगढी प्रिमियर लिग (डिपिएल) र काठमाडौंमा एभरेष्ट प्रिमियर लिग (ईपिएल) क्रिकेटको सफल आयोजनापछि पोखरामा पनि पिपिएल क्रिकेट सुरु हुन लागेको हो ।साभार ईमेजखबरबाट
