भारतदेखि सीमा नाका गड्डाचौकीबाट हुने आवतजावतमा रोक

कञ्चनपुर,माघ,१३-कोरोनाको नयाँ भेरियन्ट ओमिक्रोनको संक्रमण बढेसँगै पश्चिमी सीमा नाका गड्डाचौकी हुँदै भारतबाट हुने आवतजावतको कार्य बन्द गरिएको छ ।

प्रमुख जिल्ला अधिकारी रामप्रसाद पाण्डेयको संयोजकत्वमा आइतवार बसेको जिल्ला कोभिड व्यवस्थापन समितिको बैठकले सोही दिन राति १२ बजेदेखि लागू हुनेगरी अर्को व्यवस्था नभएसम्मका लागि अत्यावश्यक कार्यबाहेक सीमा नाकामा भारततर्फबाट हुने आवतजावत (साइकलमार्फत हुने क्यारिङ समेत) नगर्ने/नगराउने निर्णय गरेको छ ।

अति आवश्यक कामले जानै पर्ने भए सोसँग सम्बन्धित कागजात र कोभिड–१९ विरुद्धको खोप लगाएको कार्ड (मोबाइलमा फोटोसमेत भए हुने) अनिवार्य रूपमा सुरक्षाकर्मीलाई देखाउनुपर्ने नियम लागू गरिएको छ ।

विवाह, व्रतबन्ध जस्ता सामाजिक कार्य गर्दा २५ जनाको संख्या नबढाई गर्ने र नित्य धार्मिक पूजा प्रार्थना बाहेकका धार्मिक भेला तथा कार्यक्रम हाललाई सञ्चालन नगर्ने र एम्बुलेन्स सेवा प्रदायक संस्थाहरूले सञ्चालनमा ल्याइएका एम्बुलेन्सहरूमा अनिवार्य रूपमा जीपीएस राख्नुपर्नेछ । रासस