काठमाडौं,साउन,२३-गृहमन्त्री नारायणकाजी श्रेष्ठले सुन तस्करी प्रकरणको अनुसन्धान सिआइबिलाई नै गर्न दिन आग्रह गर्नुभएको छ।
मंगलबार प्रतिनिधि सभा बैठकमा सम्बोधन गर्दै गृहमन्त्री श्रेष्ठले विमानस्थलबाट तस्करी भएको क्विन्टल सुन प्रकरणको अनुसन्धान सिआइबिलाई गर्न दिन आग्रह गर्नुभएको हो।उहाँले संगठित अपराधमा अनुसन्धान गर्न ६० दिन समय हुने र अब सिआइबिले अनुसन्धानका लागि ३५ दिन पाउने उल्लेख गर्दै ३५ दिनमा अनुसन्धान सकेर दोषिलाई कानूनी दायरामा ल्याउने बताउनुभयो।
गृहमन्त्री श्रेष्ठले सिआइबिले अपराधि लुकाउने र्दुनियत देखायो भने मात्र छानविन समिति बनाउने विषयमा छलफल गर्न सकिने बताउनुभयो । विगतमा बनाइएको संसदीय छानविन समितिले हराएको सुन भेट्टाउन नसकेको तथा समितिको प्रतिवेदन समेत कार्यान्वयन नभएको भन्दै उहाँले राज्यको संयन्त्रलाई नै अनुसन्धानको जिम्मेवारी दिनुपर्ने बताउनुभयो । गृहमन्त्री श्रेष्ठले सरकारले दोषिलाई पहिचान गरी कारबाही प्रक्रियामा ल्याइ छाड्ने भन्दै त्यसको निम्ति सकारात्मक वातावरण बनाइदिन आग्रह गर्नुभयो ।
गृहमन्त्री श्रेष्ठले भेपमा सुन तस्करी प्रकरणको फाइल आफ्नो टेबलमा आइनपुगेको पनि स्पष्ट पार्नुभयो।उहाँले आफुले सो प्रकरणको पनि निष्पक्ष अनुसन्धान गरेर तथ्य, प्रमाणले देखाए अनुरुपको अभियोजनको प्रक्रियामा जान प्रहरीलाई निर्देशन दिएको बताउनुभयो।आफु व्यक्ति विशेषलाई जोगाउन नलागेको भन्दै उहाँले माओवादी केन्द्रकै मान्छे भएपनि दोषि देखिएमा नछुट्ने बताउनुभयो।उहाँले प्रमाण पुगेकाहरु कोही नउम्किने बताउनुभयो।०
उहाँले ललिता निवास जग्गा प्रकरणको सम्बन्धमा सर्वोच्च अदालतले दिएको पछिल्लो फैसलाले अनुसन्धानलाई अगाडी बढाउन थप आधार प्रदान गरेको बताउनुभयो।उहाँले सो प्रकरणको अनुसन्धान जारी रहेको बताउनुभयो।अदालतको आदेशलाई सकारात्मक रुपमा लिनुपर्ने भन्दै उहाँले यसको पनि स्वच्छ र निष्पक्ष ढंगले अनुसन्धान गर्न प्रहरी प्रशासनलाई निर्देशन दिइएको बताउनुभयो।
गृहमन्त्री श्रेष्ठले नक्कली भुटानी शरणार्थी प्रकरणको सम्बन्धमा पनि अनुसन्धान, तथ्य र प्रमाणले भेटेसम्मका मान्छेहरुसम्म पुग्न प्रहरीलाई कुनै बाधा नभएको बताउनुभयो।उहाँले प्रहरीलाई यस प्रकरणमा पनि अनुसन्धानका लागि कुनै हस्तक्षेप नभएको उहाँले स्पष्ट पार्नुभयो।शंकाको आधारमा कसैलाई दोषि करार गर्न नमिल्ने भन्दै उहाँले तथ्य र प्रमाणको आधारमा व्यक्तिहरुमाथि अनुसन्धान भइरहेको बताउनुभयो।
मन्त्री श्रेष्ठले देशमा सुशासन कायम गर्ने सन्दर्भमा राष्ट्रिय सहमती गर्नुपर्ने बताउनुभयो।उहाँले तस्करहरुलाई कारबाही गर्न एकतावद्ध हुन सबैमा आग्रह गर्नुभयो।ईमेजखबरबाट
