काठमाडौं,असार,२२-
प्रेस काउन्सिलका कार्यबाहक अध्यक्ष तथा वरिष्ठ पत्रकार किशोर श्रेष्ठको रातो पार्सपोर्ट खारेज भएको छ । बुधबार साँझ प्रधानमन्त्री निवास बालुवाटारमा बसेको मन्त्री परिषद् बैठकले श्रेष्ठको विशेष सुविधासहितको रातो पार्सपोर्ट खारेज गरेको हो ।
न्युज २४ टेलिभिजनबाट संचालित सिधा कुरा जनतासँगका संचालक रवी लामिछानेको अमेरिकी नागरिकताको बिषयमा प्रेस काउन्सिलले छानविन शुरु गरेपछि पत्रकार श्रेष्ठको रातो पासपोर्टको बिषय पनि विबादमा तानिएको थियो ।
प्रेस काउन्सिलले सिधा कुरा जनतासँग कार्यक्रमका संचालक रवी लामिछानेको उजुरीमाथि छानविन शुरु गरेपछि लामिछानेले पनि श्रेष्ठको रातो पासपोर्टको बिषय छानविन हुनुपर्ने माग गर्दै आएका थिए । बुधबार बसेको मन्त्रीपरिषद् बैठकमा प्रधानमन्त्री ओलीको सिधा निर्देशनमा श्रेष्ठले लिएको रातो पार्सपोर्ट खारेजीको निर्णय गरेको हो । संयोग श्रेष्ठकी आमाको निधन भएकै दिन सरकारले उनको रातो पार्सपोर्ट खारेज गर्ने निर्णय गरेको छ ।
तत्कालिन एकीकृत नेकपा माओवादीका नेता कृष्णबहादुर महरा परराष्ट्रमन्त्री भएका बेला श्रेष्ठले रातो पासपोर्ट पाएका थिए । प्रेस काउन्सिलका अध्यक्षले रातो पासपोर्ट पाउने व्यबस्था भए पनि कार्यबहाक अध्यक्षले भने रातो पासपोर्ट पाउने व्यबस्था छैन ।
