काठमाडौं,मंसिर,२८-
नेपाली कांग्रेसका नेता महेन्द्र यादवले माओवादी अध्यक्ष प्रचण्डलाई प्रधानमन्त्री स्वीकार गर्न आफूहरु तयार रहेको बताउनु भएको छ। तर, एमाले अध्यक्ष केपी शर्मा ओली प्रधानमन्त्री भए परिवर्तनका उपलब्धिहरु सबै गुम्नसक्ने उहाँको दाबी छ ।
आज रिपोर्टर्स क्लब नेपालले आयोजना गरेको साक्षात्कारमा मन्त्री यादवले भन्नुभयो परिवर्तनका एजेण्डालाई कार्यान्वयन गर्न माओवादीले अब ‘गार्जियन’ को भूमिका निर्वाह गर्नुपर्छ । माओवादी एमालेको पिछलग्गु हुनुहुँदैन, किनकी एमाले सबै उपलब्धिहरु गुमाउने तरखरमा छ ।’
उनले प्राप्त उपलब्धि रक्षाका लागि प्रचण्ड देशको अभिभावकको भूमिकामा आउनुपर्ने धारणा राख्नुभयो । ‘प्रचण्डजी प्रधानमन्त्री बन्नुभयो भने सबैलाई समेटेर लैजान सक्नुहुन्छ, उपलब्धिहरु संस्थागत हुन्छन्’ उहाँले भन्नुभयो उहाँ आफैं प्रधानमन्त्रीको रुपमा अघि बढ्नुपर्छ, हाम्रो समर्थन रहन्छ ।’
उहाँले एमाले अध्यक्ष ओलीलाई भड्काउ नेताको रुपमा चित्रण गर्नुभयो । यादवले थप्नुभयो , ‘ओलीजी अतिवादी कुरा गर्ने नेता हो । देशलाई त अहिले सबैलाई मिलाएर लैजान सक्ने नेता चाहिएको छ, त्यो भनेको प्रचण्ड हो, उहाँलेमात्रै सबैलाई मिलाएर लैजान सक्नुहुन्छ भन्ने हाम्रो विश्वास हो ।
विगतमा प्रचण्डको भूमिकाले पनि सबैलाई समेटेर लैजान सक्ने विश्वास पैदा गरेको उहाँले बताउनुभयो । यादवले भन्नुभयो, ‘प्रचण्डजी सहनशील, अनुभवी, स्थिर, नआत्तिने र मुलुक र जनताप्रति अति नै संवेदनशील र जिम्मेवार नेता हुनुहुन्छ, त्यसैले उहाँ गार्जियन बन्नुपर्छ, प्रधानमन्त्री बन्नुपर्छ ।’
कांग्रेसले सबैलाई मिलाएर लैजान खोजेको तथा अतिवादी कुरा नगरेकाले चुनाव हारेको यादवले बताए । तर, कांग्रेसभित्र देउवाको विकल्प नभएको भन्दै उहाँले भन्नुभयो अहिले विशेष महाधिवेशनको आवश्यक छैन ।’
देउवा निकट मानिएका यादवले चुनावको समिक्षा र भावी रणनीति तय गर्नेबारे बरु छिट्टै महासमिति बैठक बस्ने र उक्त बैठकले पार्टीलाई कसरी सुधार गर्ने भनेर छलफल हुने जानकारी दिनुभयो ।
