काठमाडौं,फाल्गुन,२८-नेपाली कांग्रेसका महामन्त्री शशांक कोइरालाले कांग्रेसको मुख्य ध्येय ओली सरकार हटाएर नेपाली कांग्रेसको नेतृत्वमा सरकार बनाउनु पर्ने बताउनुभयो ।
शुक्रबार नेपाल शिक्षक संघ बागमती प्रदेश कार्यसमितिको कार्यक्रमलाई सम्बोधन गर्दै महामन्त्री कोइरालाले ओली सरकारलाई हटाएर नेपाली कांग्रेसको नेतृत्वमा नयाँ सरकार गठन गर्नु आफूहरुको मुख्य ध्येय रहेको बताउनुभयो ।
यसका निम्ति मधेसवादी दलहरुसँग छलफल चलिरहेको पनि उहाँले बताउनुभयो। ‘नेपाली कांग्रेस पर्ख र हेरको अवस्थामा छ। आज पनि मधेसी पार्टीहरूसँग छलफल चलिरहेको छ। अहिले हाम्रो मुख्य ध्येय के हो भने ओली सरकारलाई हटाएर एउटा नयाँ सरकारको गठन गर्नुपर्छ। जसको नेतृत्व नेपाली कांग्रेसले गरोस् भन्ने मनशाय भएको कोइरालाले बताउनुभयो ।
कार्यक्रममा नेपाली कांग्रेसका नेता गगन थापाले सरकारको नेतृत्व नेपाली कांग्रेसले गर्नुपर्नेमा जोड दिनुभयो। नेता थापाले सरकारको नेतृत्व गरेर प्रधानमन्त्री ओलीले संविधानमा पारेको भ्वाङलाई टाल्ने र देशलाई निर्वाचनमा लगेर नयाँ जनादेशबाट पाँच वर्षका लागि नेपाली कांग्रेस आउनुपर्ने बताउनुभयो ।
उहाँले भन्नुभयो, ‘सम्भव हुन्छ। सकिन्छ भने यही पटक प्रधानमन्त्री केपी शर्मा ओलीलाई घर पठाउनुपर्ने छ र नेपाली कांग्रेसको नेतृत्वमा अहिले सकिन्छ भने अहिले हामीले सरकार बनाएर, आठ महिना, एक वर्ष चलाएर ओलीले संविधानमा पार्नुभएको भ्वाङ टालेर निर्वाचनबाट पाँच वर्ष कांग्रेसले ती संकल्प पूरा गर्ने काम हामीले गर्नुपर्छ।’
प्रधानमन्त्री केपी शर्मा ओलीलाई कायमै राखे राज्यका सम्पूर्ण संयन्त्रलाई दबाब र प्रभावमा पारेर कब्जा गर्ने र प्रजातन्त्रलाई कमजोर बनाउने उहाँको ठहर थियो। प्रधानमन्त्री ओलीलाई शासन सत्ता दिइराख्दा नेपालमा नाम मात्रैको चुनाव गराउने नेता थापाले प्रतिक्रिया दिनुभयो।
