काठमाडौं,बैशाख,२२-नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले भरतपुर महानगरपालिकामा रेनु दाहाललाई जिताए गठबन्धन १५ वर्षसम्म जाने बताउनुभएको छ ।
चितवनमा भएको गठबन्धनको सभालाई सम्बोधन गर्दै उहाँले भरतपुरमा रेनु दाहाललको टीमलाई जिताएमा अहिले भइरहेको गठबन्धन १० देखि १५ वर्षसम्म जाने बताउनुभयो ।
‘रेनु दाहाललाई जिताए गठबन्धन १५ वर्षसम्म जान्छ,’ उहाँले भन्नुभयो, ‘चितवनमा कांग्रेसको भोट माओवादीमा ट्रान्सफर गर्न कठिनाइ भएको छ, त्यसो भए देश दुर्घटनामा जान्छ ।’
गठबन्धन राष्ट्र, गणतन्त्र, लोकतन्त्रको आवश्यकताका लागि भएको बुझ्न आग्रह गर्दै उहाँले कांग्रेस कार्यकर्ताले पनि मन फुकाएर मतदान गर्ने विश्वास व्यक्त गर्नुभयो ।
अध्यक्ष दाहालले रुखको भोट हसिया हथौडामा ट्रान्सफर गर्न गाह्रो भएको र त्यसमध्येको एक जिल्ला चितवन भएको स्मरण गर्नुभयो ।
‘हसिया हथौडाको भोट रुखमा सहज गए पनि रुखको भोट हसिया हथौडामा जान सकस भएको देखेँ,’ उहाँले भन्नुभयो, ‘अन्तन्त सकस हुनेमध्येको ठाउँ भनेको चितवन र मधेश हो ।’
नेपाली कांग्रेसका कार्यकर्ताले असन्तुष्टि जनाएकोमा जवाफ दिँदै अध्यक्ष दाहालले नेपालको इतिहासलाई नजिकबाट बुझ्ने कोसिस गर्न आग्रह गर्नुभयो ।
उहाँले प्रश्न गर्नुभयो, ‘विस्तृत शान्ति सम्झौता लगायतका २०४६ र २०६२÷६३ सालमा भएका आन्दोलनमा रुख र हसिया हथौडाको सम्झौता गतल भन्न सक्नुहुन्छ ?’
अध्यक्ष दाहालले कांग्रेस र अन्य पार्टीका कार्यकर्ताले साथ दिए गठबन्धन नछुट्ने बताउनुभयो । आफूमाथि फेरि एमालेसँग मिल्न जान्छ कि भन्ने आशंका गरिएकोप्रति उहाँले ज्ञान प्राप्त गरेर आएकाले अब त्यस्तो नहुने बताउनुभयो ।
उहाँले भन्नुभयो, ‘म ज्ञान प्राप्त गरेर आएको छु, मलाई शंका नगर्नुस् ।’ईमेजबाट
