काठमाडौं,भदौ,२९-आज हरितालिका तिज मनाईदै।
हिन्दु नेपाली महिला दिदिबहिनीहरुको महान चाड अर्थात महत्वपूर्ण सांस्कृतिक तथा धार्मिक पर्व हरितालिका तीज आज नेपालसहित विश्वका विभिन्न देशमा रहेका नेपाली आमा-दिदीबहिनीहरूले श्रद्धा, उत्साह र उमंगका साथ मनाउँदैछन्।
तीजको अवसरमा नेपाली महिलाहरूले परम्परागत रातो पहिरन, गरगहना तथा श्रृंगारमा सजिएर शिव-पार्वतीको पूजा-आराधना गर्ने, व्रत बस्ने तथा सुख, शान्ति र समृद्धिको कामना गर्ने परम्परा रहिआएको छ।
तीज नेपाली समाजमा धार्मिक आस्था मात्र नभई महिला दिदीबहिनीबीचको आत्मीयता, भेटघाट र सांस्कृतिक पहिचानलाई जोड्ने महत्वपूर्ण पर्वका रूपमा समेत स्थापित छ।
नेपालका विभिन्न स्थानमा तीज विशेष कार्यक्रम, पूजा-आराधना, दर खाने तथा सांस्कृतिक कार्यक्रम आयोजना भइरहेका छन्।
यस्तै, रोजगारी, अध्ययन तथा विभिन्न पेशा–व्यवसायका सिलसिलामा विदेशमा रहेका नेपाली समुदायले पनि आफ्नो मौलिक संस्कृति र परम्परालाई निरन्तरता दिँदै तीज मनाइरहेका छन्।
जापान, दक्षिण कोरिया, अमेरिका, बेलायत, अस्ट्रेलिया, युरोप तथा खाडी मुलुकलगायतका देशमा रहेका नेपाली महिलाहरूले समेत सामूहिक रूपमा तीज कार्यक्रम आयोजना गर्दै नेपाली गीत-संगीतमा नाचगान, भेटघाट तथा शुभकामना आदानप्रदान गरिरहेका छन्।
परदेशमा रहे पनि नेपाली भाषा, संस्कृति, परम्परा र चाडपर्वलाई जीवन्त राख्ने प्रयासले तीजलाई विश्वभर छरिएका नेपालीहरूलाई भावनात्मक रूपमा जोड्ने अवसरसमेत बनाएको छ।
हरितालिका तीजले नेपाली महिलाहरूको धार्मिक आस्था, सांस्कृतिक पहिचान र आपसी सद्भावलाई अझ बलियो बनाउँदै परिवार तथा समाजमा सुख, शान्ति र समृद्धिको कामना गर्ने अवसर प्रदान गरेको छ।
बिहानी अनलाइन परिवार सम्पूर्ण नेपाली आमा, दिदीबहिनी तथा देश-विदेशमा रहनुभएका सम्पूर्ण नेपालीमा हरितालिका तीजको हार्दिक मंगलमय शुभकामना व्यक्त गर्दछ।
